Comhchosaint Cibearspáis (COM JCDC)

Rugadh an Briogáidire-Ghinearál Staunton i mBaile Átha Cliath, agus tá breis agus 40 bliain de thaithí aige i róil a bhaineann leis an gCoisíocht agus le Seirbhísí Cumarsáide agus Faisnéise (CIS). D’fhóin sé i róil éagsúla laistigh de na Fórsaí Cosanta chomh maith le tréimhsí seirbhíse thar lear leis na Náisiúin Aontaithe agus le NATO.

Ó mhí Eanáir 2020 i leith, bhí an ceapachán is déanaí ag an mBriogáidire-Ghinearál Staunton mar Stiúrthóir J6, áit a raibh sé freagrach as na córais chumarsáide agus faisnéise (CIS) riachtanacha a sholáthar, a thacú agus a chothabháil chun freastal ar riachtanais cheannais, rialaithe, riaracháin agus chosanta cibearspáis na bhFórsaí Cosanta. Roimhe sin, bhí sé ina Oifigeach i gCeannas (OIC) ar Oibríochtaí Reatha na bhFórsaí Cosanta in J3&5 ag Ceanncheathrú na bhFórsaí Cosanta (DFHQ) ón mbliain 2017. Díreach roimhe sin, bhí sé i gceannas ar Chomhlacht Seirbhísí Cumarsáide agus Faisnéise na bhFórsaí Cosanta (DFHQ CIS Coy) idir 2014 agus 2017. I measc na bpost eile a bhí aige roimhe seo, bhí sé ina Shinsear-Oifigeach Foirne sa Bhrainse Pleanála Straitéisí ag DFHQ; ina Oifigeach G6 ag Ceanncheathrú an Dara Briogáide; agus ina Oifigeach Ceannais ar an Dara Comhlacht CIS Allamuigh (2 Field CIS Coy) i mBeairic Chathail Brugha i mBaile Átha Cliath. Chomh maith leis sin, d’fhóin sé leis an Dara Cathlán Coisithe (2 Inf Bn), le Scoil Phrintíseach an Airm agus leis an Tríú Cathlán Coisithe (3 Inf Bn). Bhí trí thréimhse seirbhíse aige mar Cheannasaí Platóin Coisithe agus mar Oifigeach Oibríochtaí (S3) le UNIFIL (1991, 1994, 2012); dhá thréimhse sé mhí mar Bhreathnóir Míleata de chuid na Náisiún Aontaithe i Sahara Thiar (MINURSO, 1997) agus sa Chósta Eabhair (ONUCI, 2014); agus tréimhse dhá bhliain sa Mheánoirthear (an tSiria) le hEagraíocht na Náisiún Aontaithe um Mhaoirseacht ar an Sos Cogaidh (UNTSO) idir 2006 agus 2008.

Bhí sé i gceannas ar Ghrúpa Tacaíochta na Ceanncheathrún le linn mhisean NATO sa Chosóvó (KFOR) ar feadh sé mhí sa bhliain 2021. Is céimí de chuid Chúrsa Ceannais agus Foirne an Choláiste Míleata é an Briogáidire-Ghinearál Staunton. Tá céim bhaitsiléara sa Tráchtáil (B Comm) agus céim iarchéime sa Dlí (LLB) aige ó Choláiste na hOllscoile, Gaillimh. Ina theannta sin, tá Ard-Dioplóma sa Teicneolaíocht Faisnéise (H Dip IT) agus céim mháistreachta sa Cheannaireacht, sa Bhainistíocht agus i Léann na Cosanta (MA LMDS) aige ó Ollscoil Náisiúnta na hÉireann, Maigh Nuad. Tá céim mháistreachta sa Staidéar Gnó (MBS sa Tráchtáil Leictreonach) aige freisin ó Choláiste na hOllscoile, Baile Átha Cliath, agus céim mháistreachta sa Caidreamh Idirnáisiúnta (M Phil i Léann na Síochána) ó Choláiste na Tríonóide, Baile Átha Cliath. Ina theannta sin, tá réimse leathan deimhnithe agus cáilíochtaí teicniúla aige i réimsí amhail an Chibearstaidéar, Cosaint Sonraí, Riarachán Líonra agus Forbairt Bogearraí, i measc nithe eile, ó European College of Security Studies, ó Institiúid na Náisiún Aontaithe um Oiliúint agus Taighde (UNITAR) agus ó chomhlachtaí gairmiúla éagsúla eile.

Tá an Briogáidire-Ghinearál Staunton pósta le hOrla agus tá triúr clainne fásta acu: Niamh, Cathal agus Róisín.

Oifigeach Poiblí Ainmnithe faoin Acht um Rialáil Stocaireachta 2015 – féach www.lobbying.ie